Juovlamánnu

Luossačivggat ja vuorrut.

Juovllat lahkonit. Go dan galbmačázis leat meađđemat ja ahtanuššamin, de leat luossačivggat iešguđet jahkegerddiin eallimin seastinnávccaiguin. Muitonjuolggadus lea ahte jus temperatuvra jogačázis šaddá galbmasat go čieža gráda, orusta dahje njoahccu goittotge muhtun muddui luossačivggaid šaddan garrasit. Šaddama vuolit rádjá sáhttá lotnašuvvat jogas johkii. Guliid liekkas lea seammalágan go joga čáhci, mii mearkkaša ahte luossa galbma dálvejogas ii dárbbaš ollu energiija bisuhit rumašlieggasa. Dat šaddet galbmas, ja buot metabolalaš proseassat rupmašis njohcot. Dat eai leat šat nu jođán, ja dain sáhttá leat váttis bissut ceaggut. Dutkit leat fuomášan dalle go čáhci galbmo, de vulget luossačivggat eret dakkár sajiin gos lea garra rávdnji jogain. Luosačivggat maid rievdadit jándorritma čáhcetemperatuvrraid mielde. Geassit leat luossačivggat doaimmalamosit beaivet, go dálvet dat leat fas doaimmalamosit ihkku. Dat vuoiŋŋastit eanaš áigge čiegussajiin, seastin dihtii návccaid. Dat leat garralunddot eallit.

Dálvejogas leat maid stuorra luosat. Dat leat ge buot nannosamosat – dat mat leat ceavzán gođu. Dat eai leat measta borran maidege dan rájes go leat giđđan boahtán mearas johkii. Gártá leat juo máŋga manu juo dassái. Sáhttá várra dadjat ahte dat leat leamaš boratkeahttá jahkebeali. Daid gohčodit vuorrun. Go giđđa boahtá de vulget vuorrut fas merrii ođđasit guohtut. Diet luosat sáhttet šaddat rivttes stuorra luossan, ja dakkárat leat dehálaččat johkii. Merkeniskosat leat dokumenteren ahte muhtun luosat leat boahtán ruovttujohkii njealje geardde. Čuomasiskkus muhtun duovveguolis Etnejogas Vestlánddas čájehii ahte dat lei johtán dien guohtunmátkki viđa geardde. Mii lea várra oláhus.