Smolta

Smoltaspierru vuojadeame. Foto: Arnt Mollan

Smolta lea suorbmaveajet mii lea nuppástuvvan. Gilgga sárgát jávket ja gorudis leat dáhpáhuvvan nuppástusat mat dagahit ahte sáhttá ealligoahtit mearračázis. Dál lea smolta gárvvis vuodjalit merrii.

Go suorbmaveajet lea peanna guhkkosaš, de sáhttit gohčodit dan “nuorran”. Nuppástus álggahuvvo ja dáhpáhuvvet stuorra nuppástusat sihke olggul ja siskkil gorudis. Suorbmaveajet nuppástuvvá smoltan. Nuppástus gohčoduvvo “smoltifisering”. Guollegorut guhkku, ruoidná ja šelggoda. Gorut nuppástuvvá nu ahte sáhttá eallit mearračázis nu ahte ii goikka. Mearrasálti sirrejuvvo suovddis ja go gužžet.  

Smolta lea gárvvis merrii. Deanurávdnji fievrrida smoltta deatnoráigge vulos. Deanunjálmmis čoahkkanit dat smávit ja stuorát joavkkuide, eai ge goassiige guođe deanu ovttaid mielde. Lea eanet oadjebas dilli go eanebut fárrolagaid vudjet spierrus. Smolta lea oalle spanas ja dat dagaha ahte sáhttet vuodjat oalle jođánit/johtilit. Go leat vel šealgadat, de leat beanta oaidnemeahttumat go vudjet buhtes mearračázis. Go johtet spierrus, de lea maid váddásat lottiide ja eará guliide fáhtet daid.

Smoltaspierru vuodjá stuorra leavttuin olggos vuonas. Muhtumat fertejit vuodjat guhkes vuonaid čađa, earáin ges lea oanehat geaidnu merrii.

Smolta máddin johtá merrii árabut go smolta davvin. Lea ain ollu maid mii eat dieđe mii mearrida goas smolta guođđá deanu giđđat.

Sáivačáhci ja mearračáhci

Sihke olbmot ja luossa dárbbaša sáltti gorudis. Sáivačázis lea unnán sálti, ja dat dagaha ahte luossa ferte seastit sáltti. Muhto mearračázis lea ges menddo ollu sálti.  

Deanus bahkke sáivačáhci čađa luossačuoma mii dagaha ahte luossa gužžá ollu. Mearračáhci ges geassá ollu sáivačázi luosas mii dagaha ahte ferte juhkat ollu čázi. Mearrasálti sirrejuvvo suovddis ja go gužžet.