Borgemánnu

Govva: Mikko Kytokorpi “Gođđoluossa Deanus deaivá Suovvila mii ohcá gođđosaji”

Ohcamin buorre gođđosaji

Mii čállit borgemánnu. Ain lea muhtun áigi ovdal go luosat gođđagohtet, muhto ráhkkaneapmi lea álgán juo. Luossa mii lea leamaš jogas juo guhkká lea massán silbaivnni ja čuopma lea čáhpodan. Goadjima čuopma šaddá dađi mielde ruoksadabbon, ja fas ruškkodišgoahtá. Goadjimis šaddagoahtá roahkki gáibái. Luosanáhki dovdu assábun ja čuomat leat giddadabbot. Gii áigu doarrut ja várra orrut dálvvi jogas das galgá leat garra čuopma. Dat ráhkkanit dál. Go dat leat bisostallan jaskadit seamma sajis várra máŋga vahku, de álgá fargga aktiivvalaš buorre gođđansaji ohcan.

Luosa doaibma lea gitta das man ollu jogas lea čáhci ja makkár temperatuvra jogas lea. Jus lea leamaš goike ja báhkka geassi de lea luossa orrun eanaš jaska. Uhcán čáhci ja alla temperatuvrrat sáhttet áibbas bissehit luossajođu. Muhto go de arvá, erenoamážit borgemánus, dalle dat ealáska oalát fas. Orru dego buot joga luosat leat vuodjamin.  

Borgemánnu lea dehálaš mánnu johkaskálžžuide. Manit sahkkehuvvojit áiddo dien áigge ja muhtun vahkuid maŋŋá ihtet smávva máđut johkii. Jus diet unna mánoš galgá šaddat de lea dat sorjavaččat gitta das ahte deaivá luossa- dahje dápmoveajeha jogas. Dat fertejit darvánit guollesuovdái ja eallit doppe 9-11 mánu ovdal go luoitilit luovus iežaset ja álggahit guhkes ja jaskes skálžoeallima. Johkaskálžžut sáhttet šaddat badjel 200 jagi boarrásat.