Suoidnemánnu

Johkaskálžžut

Divrešurran ja loddelávlun johkalegiin

Geassi lea alimusmuttus. Geassejohka lea liekkas, ja luossaveajehiiguin lea alla aktivitehtadilli. Dat borret ja sturrot. Mearas bohtet velge rávis luosat. Lea eallin sihke jogas ja johkagáttis. Sutnje ge geas ii leat stággu sáhttet leat máŋga luondduvásáhusa. Čáhcegiera sáhttá fáhkkestaga lihkastit go stuorra luossa finiha čázeoaivvis, ja jus geavahat veahá áiggi de sáhtát fuomášit daid unnimus luosaid jogas. Luossaveajehat iešguđet jahkegerddiin iđistit čiegusbáikkiin borastan dihtii juoidá ja de – fas jávkkihit. Máŋga johkabotnis sáhtát oaidnit johkaskálžžuid mat sillejit čázi iežaset oránša suvddiiguin. Johkagáttis lea divrešurran ja vizardeapmi. Čáhcelottit vuojašeamen jogas lea dábálaš oaidnámuš. Soaittáhagas sáhtát maid deaividit čeavráin ja mádjigiin.

Jus galgat beassat vásihit buot dieid elliid de fertejit gáddešattut leat doppe. Muorat, miestagat ja bohtut johkagáttis leat dehálačča vai divrrit mat leat heakkadehálačča borramuš sihke lottiide ja guliide. Gáddešattut lea maid orrunsadjin ja suodjin ollu lottiide. Muorat ja miestagat addet dehálaš suoji johkii dalle go beaivváš báitá garrasit suoidnemánus. Ja muorat dollet eatnama gitta ja hehtte erošuvnna ja fierramiid johkii. Orgánalaš ávnnas gáddešattuin mii gártá johkii šaddá dehálaš biebmun bodnedivrriide mat fas gártet leat biebmun luossaveajehiidda. Dan lassin mearkkašit oavssit ja johkii gahččan muorat suodjin guliide ja eará elliide. Bodnedivrriid ii leat álki áicat, muhto dat leat doppe. Bodnedivrrit leat vuosttamužžan divremáđut mat gohčoduvvojit nymfan, muhto doppe leat maid máđut, riipput, skálžžut, smávva reabbáeallit ja čáhcedihkit. Diet leat buot dutkan veara.

Govva: Kjell Sæther

Eai buot luossabivdit liiko dieid gáddešattuide, dasgo dat dahká váttisin go áigu oaggut, muhto gáddešattuid haga šaddá leat uhcánat gulli.