Čakčamánnu

Govva: Henrik Hårdensson Berntsen, NINA

Ruoššaluossa – sávakeahtes johkii

Galbma áibmu muitala ahte čakča lahkona. Lussii šaddá gođđohápmi ja vuodjá gođđosajiide. Ain lea muhtun áigi ovdal gođu, muhto máŋga jogas gávdnojit juo sahkkehuvvon luossameađđemat botne čievrras. Diet leat meađđemat mat eai eisege galggašii leat doppe. Daid meađđemiid lea gođđan jaskesábiluossa, namalassii ruoššaluossa. Ruoššaluossa lea amas šládja mii biddjojuvvui jogaide Guoládatnjárggas loahpageahčen 1950 logus. Váidalahtti lea ahte dál dat lea gođđagoahtán bures norgga jogain. Guovlu Norggas gos leat ollu ruoššaluosat lea stuorrumin.

Ruoššaluossa sáhttá buktit dávddaid ja dihkiid, ja dat sáhttá heađuštit sihke luosa, guvžžá ja vallasa. Ruoššaluossa vállje seamma gođđosajiid go min luossa, guvžá ja valas, muhto dat gođđá árat. Mii diehtit go ruoššaluossa lea gođđimin de dat šaddá hirbmat vašán, ja báikkálaš luossaguolit dihtet ahte buoremus lea bissut olggobealde daid báikkiid gos dat muđui livčče gođđan. Ruoššaluosa meađđen čivgá árrat giđđat ja das lea hoahppu beassat merrii. Dat lea dušše moadde vahku jogas ovdal go dat vuolgá. Ruoššaluossaveajehat sáhttet leat hui ollu ja dat borret ollu dan oanehis áiggis maid dat leat jogas. Erenoamážit ruoššaluosat mat leat čivgan badjelis jogas sáhttet borrat ollu luossaveajehiid borramuša go dat leat jođus merrii.

Ruoššaluosaid invašuvdna lei erenoamáš stuoris 2021:s. Ii goassege ovdal leat registrerejuvvon nu stuorra lohku. Erenoamážit davvi jogat čuozahuvvojedje garrasit. Mii eat vel dieđe makkár konsekveanssat das leat.

Govva: Mikko Kytokorpi,   “Deanu luossa ohcamin gođđosaji”