Miessemánnu
Foto: Arnt Mollan
Muhtumat bohtet – earát mannet
Miessemánnu lea máŋga jogas huššos áigi stuorát ja unnit luosain. Uhcimus luosat jogas leat čivggat mat eai ba guhkes áigi dassái rahče olggos meađđenseahkas. Dál dat leat geavahan buot meađđenseahka niestti mii dain lei go dat sahkkehuvvojedje, ja dál dat fertejit ieža gávdnat biepmu. Dat lea garra eallin ja uhca čivggas ferte gávdnat buriid čiehkádansajiid. Dat vuojadit jogas ovttas eará čivggaiguin mat leat árabut šaddan. Dat leat ovtta jagis gitta njealji viđa jahkái, dat lea gitta das makkár jogas dat leat šaddan. Buot guolit gilvalit saji ja borramuša alde.
Máŋga rávis gođđoluosa mat gođđe mannan čavčča leat ceavzán almma ahte leat borran maide olles dálvvis. Dál dat leat guoiran, ja ráhkkanit vuolgit ođđasit merrii. Daid gohčodit vuorrun. Oassi dain lea juo mannan. Rikkis guohtunguovlluin mearas buoidi vuorru fas johtilit, ja diet luosat sáhttet šaddat rivttes juo stuorrá.
Luosjulggiin lea leamaš áigodat gos leat leamaš stuorra nuppástusat sihke olgohámis ja láhttemis. Dál dat leat silbačuovgi, ja dihto siva dihtii diktet dat iežaset doalvut vulos johkaráigge. Go nu dáhpáhuvvá, gohčodat mii daid smoltan. Joavkkuid mielde dat fáhkka mearridit guođđit ruovttujoga. Mátki alde deaividit sihkkarit muhtun rávis luosain seamma jogas maid mii jođus ruoktot fas gođđat. Miessemánus dáhpáhuvvá measta luosa olles eallingeardi